សហរដ្ឋអាមេរិក៖ លោកស្រី កាម៉ាឡា ហារីស (Kamala Harris) បានបញ្ចប់ការសម្រេចចិត្តជ្រើសរើសបេក្ខភាពអនុប្រធានាធិបតីរបស់លោកស្រីជាផ្លូវការហើយ ខណៈបេក្ខភាពអនុប្រធានាធិបតីដែលលោកស្រីនឹងជ្រើសរើសអាចនឹងត្រូវបើកបង្ហាញនៅរយៈពេល ២៤ម៉ោងខាងមុខ ពោលគឺនៅមុនពេលដែលលោកស្រីនឹងចាប់ផ្តើមដំណើរបង្ហាញខ្លួនជាផ្លូវការមុននឹងការបោះឆ្នោតឈានចូលមកដល់នាខែវិច្ឆិកាខាងមុខ។ 

គួរឱ្យដឹងថា លោកស្រី Kamala Harris នឹងចាប់ផ្តើមដំណើរការឃោសនាប្រជែងជាមួយលោក ដូណាល់ ត្រាំ (Donald Trump) ចាប់ពីថ្ងៃទី០៦ ខែសីហានេះតទៅ ដោយរដ្ឋដំបូងបង្អស់ដែលលោកស្រីនឹងបង្ហាញខ្លួនគឺរដ្ឋ Pennsylvania។ សារមួយរបស់លោកស្រីនៅលើបណ្ដាញសង្គម X ថ្លែងថា៖ "ការបោះឆ្នោតនាពេលខាងមុខគឺជាការប្រយុទ្ធដើម្បីសហរដ្ឋអាមេរិក និងដើម្បីអនាគត, សេរីភាព និងសិទ្ធិជាមូលដ្ឋានរបស់យើង"។ សារដដែលបញ្ជាក់ថា "យើងជឿជាក់លើការសន្យារបស់អាមេរិក ហើយយើងស្ថិតក្នុងការប្រយុទ្ធនេះ ដោយសារយើងដឹងច្បាស់ពីអ្វីដែលជាបញ្ហា"។

ក្រោយឈ្នះការប្រជែងតំណែងជាបេក្ខភាពប្រធានាធិបតីរបស់គណបក្សប្រជាធិបតេយ្យ អនុប្រធានាធិបតីជាស្រ្តីសំបុរខ្មៅ និងមកពីតំបន់អាស៊ីខាងត្បូងរូបនេះឈានទៅសន្និបាតជាតិនៅទីក្រុង Chicago ក្នុងរយៈពេលពីរសប្តាហ៍ក្នុងការគ្រប់គ្រងគណបក្ស។ គួរបញ្ជាក់ថា បេក្ខភាពប្រធានាធិបតីជាស្រ្តីរូបនេះធ្លាប់ជារដ្ឋអាជ្ញាអាមេរិកទៀតផង ខណៈលោកស្រីបានទាក់ទាញការគាំទ្របានយ៉ាងច្រើនលើសលុប ជាពិសេសគឺក្រោយការប្រកាសគាំទ្រពេញទំហឹងពីលោក ចូ បៃដិន ក៏ដូចជាអតីតប្រធានាធិបតីអាមេរិក លោក ប៉ារ៉ាក់ អូបាម៉ា៕